حوار الفاشية
المشير : الو مساء الخير
المرشد : السلام عليكم ورحمة الله وبركاته نتمنى ان يكون كل شىء على ما يرام سيادتك.
المشير(مقاطعاً) : بدون الدخول فى تفاصيل ومقدمات هو انتم مش ناويين تجيبوها البر ليه ؟
المرشد : ارجو التوضيح يافندم لست افهم ما تقول !!!
المشير : وهتفضلوا طول عمركم مش فاهمين دة احنا دافنينه سوا .
المرشد : والله يافندم نتمنى ان نتعلم ونفهم من سيادتك .
المشير : هو احنا مش كان فى بينا اتفاق اتعمل مع الراجل بتاعنا ايام الثورة واتفقنا انكم تاخدوا مجلس الشعب واحنا ناخد الدستور ويبقى لينا وضعنا الخاص والراجل الكبير يخرج خروج امن هو ورجالته .
المرشد : سيادتك نحن ملتزمين بالإتفاق وسيادتك تعلم جيدا اننا لا نخالف اتفاقتنا وعهودنا.
المشير (ضاحكاً) : بقالى كتير مضحكتش كده - بس بخصوص موضوع انكم مبتخالفوش اتفقاتكم دى ممكن ترجع للتاريخ وانت تعرف احنا اتفاقنا كان انكم تبقوا طراطير فى البرلمان ودة كان متفق عليه وخليتم الناس تنزل تقول نعم عشان نرقع الدستور وانت عارف المادة 56 من الاعلان الدستورى بتقول ايه تيجوا بعد كده تعضوا الايد اللى اتمد لكم قانون عزل ايه اللى جاى تقول عليه الراجل بتاعنا نازل نازل وكل واحد عارف رقم زنزانته .
المرشد : سيادتك الكلام دة خطير جدا ونحن لا نقبل التهديد والثورة ستنتصر فى النهاية بإذن الله وسنطبق شرع الله .
المشير (ضاحكا ) : انت النهاردة لطيف جدا يا بديع ومسلى ثورة ايه اللى ستنتصر وانت اللى جاى تتكلم عن الثورة !!! كلنا استفادنا من الثورة احنا اسقطنا مخطط التوريث وانتم طلعتوا للنور وخرجتوا من زنازينكم
المرشد : سيادتك الشعب معانا ونستطيع حشده للخروج فى الميادين مرة أخرى
المشير : مش بقولك انت لطيف جدا النهاردة. شارع مين وشعب مين احنا اللى نجحناكم ونقدر نسقطكم و البركة فى إعلامنا المتميز الشارع النهاردة مش طايقكم دة حتى العيال بتوع الثورة مش طايقنكم .
المرشد (يشعر بالحرج ) : الشعب يعرف تاريخكم وتاريخ نظامكم جيدا وتحالفاتكم مع الكبار بالخارج ولن يبقى عليكم .
المشير : هو انت متعرفش ان كل الحنفيات فى ايدينا واحنا بنفتح وبنقفل زى منحب والناس غلابه ولو فتحنا حنفيات التموين والبنزين والانبايب هيفرحوا اوى وبخصوص الكبار بالخارج انتم ايضا تعلموا ان علاقتنا بهم قوية جدا واقوى منكم وانتو كارت جديد ليهم واحنا ممكن نحرقكم عندهم فى اى وقت وغير كده انتم مش خدتم البرلمان والشورى عايزين كمان الحكومة والرئيس.
المرشد(محاولاً استدراك الأمر) : اعتقد اننا من الممكن ان نصل لحلول وسط .
المشير (بلهجة عسكرية) : احنا معندناش حاجه اسمها حلول وسط كل الخيوط فى ايدينا وافتكر احنا عملنا ايه فى العيال بتوع الثورة والعاقبة لن تكون مرضيه لكم .
المرشد : الو الو الو !!!
ليست هناك تعليقات:
إرسال تعليق